منتديات حبي زيزو
 
الرئيسيةاليوميةمكتبة الصورس .و .جبحـثالتسجيلدخول
اللهم صلي على محمد وال محمد

شاطر | 
 

 ماهقيت حبك سراب

استعرض الموضوع السابق استعرض الموضوع التالي اذهب الى الأسفل 
كاتب الموضوعرسالة
$خيال$

avatar

عدد المساهمات : 68
نقاط : 2891
تاريخ التسجيل : 12/02/2010

مُساهمةموضوع: ماهقيت حبك سراب   الإثنين فبراير 15, 2010 4:32 am

بسم الله الرحمن الرحيم
السلام عليكم ورحمة الله وبركاته احب ابتدي ولأول مره على منتدى حبي زيزو اجرب موهبتي العزيزه علي وهي الروايه
كنت دايما تخيل قصص خياليه والواقع اهو الاحق بالروايه لان الواقع الحين اقوى بكثير من الخيال كنا نتصور اشيا ونضحك على انفسنا ونقول ولا بالخيال لكن تتحقق وتصير اكثر من الخيال راح تختلط روايتي بالخيال وبالحقيقه اكثر
راح ابتدي بروايتي وانا اتمنى انها راح تعجب كل من يقراها:
جلست سحر من النوم على طول قامت للمرايه تناظر وجهها الذابل عقب ليلة البارح والصياح اللي ماسكتها منه الا النوم كانت تهتم بشكلها كثير حتى لو كانت بأزمه تحاول انها ماتبين لاي احد لان اعدائها كثير ويحبون يشوفونها بحزن وضيقه وكانت شخصيتها قويه ماتحب تبكي ولاتبين لاحد حزنها الا انها ماتتحمل تشوف احد يصير له شي حتى لو اعدائها سحر بنت عمرها 17تدرس بثالث ثانوي حلمها تكون جراحه (دكتورة عمليات) لكن بدا حلمها يتحطم بعد ماتزوج حبيبها الوحيد اللي خلاها تحب الحياه بعد ماتوفت امها الله يرحمها وابوها تزوج قريبه لامها لكن ماحافظت عليهم وتعاملت معاها اهي واخوها الوحيد بقسوة خلتها تعيش فترة مراهقتها بحزن وتعقيد سحر محبوبه عند صديقاتها مررررره مايقدرون يستغنون عنها ولانها كانت مثقفه كثير كانوا اغلب صديقاتها اذا واجهوا مشاكل على طوووووووووووول وينك ياسحر
عقب ماسرحت سحر بنفسها بالمرايه شوي ضحكت وقالت يلا لازم اليوم اتنشط واروح حق اعز صديقه عندي بسمه واطمنها علي عقب ماخوفتها امس بصياحي راحت جهزت ملابسها وتروشت كلمت ابوها تستاذن منه عشان تروح مع السواق بيت صديقتها طبعا ابوها كان قاسي شوي بس لانها يتيمه يحن قلبه عليها لكن السبب اهي مرت ابوها اللي بس تحاول تشوف سحر كئيبه على طول طلعت سحر بعد ماكلمت صديقتها بسمه وعطتها خبر انها بتروح لها طبعا بسمه كثير فرحت وبلغت البيت كله ان سحر بتجيهم ::
بسمه::يممممممممممممممممممممممممممممه
الأم :: وجع يوجع ابليس شفيك تصارخين كن احد لاحقك
بسمه::يمه سحر بتجي بعد شوي
الام:: حياها الله البيت بيتها هالبنت طيبه مثل الريشه عالقلب
بسمه:: اي والله انا مستانسه بروح اجهز قبل لاتجي سحر وتشوف كشتي
الام::هههههه الله يرجك من بنت
وهي طالعه من المطبخ صقعت بأخوها محمد آآآآآآآآآآآآآي وجع ماتنتبه
محمد:: وجع يوجعك انتي عورتي قلبي اقولك بسوم من اللي بيجي بعد شوي
بسمه واهي عارفه نية اخوها محمد ::سوسو سحورة بتجي الحين وعلى فكره مابي اشوف وجهك بالبيت اطلع اي مكان مانبيك تضايق حبيبتي سحور اهي خجوله مررره واذا قعدت تتناقز بالبيت ماراح تجي
محمد::انقلعي بس اصلا انا طالع من الصبح توني جاي وماني متحرك قاعد على قلبك منقهر ة مني هااالأن سحر تشوفني وتذوب
بسمة::وعععع تحبك انت اذا تحبك انا بنفسي اسلمها مستشفى المجانين
محمد ويحط يده على شعره واهو طويل وناعم وحلو مررره ويمسح عليه ::انا البنات يركضون ركض تطيح نعالهم عشاني وتتقولين مستشفى مجانين مالت عليك ثم مالت عليك اقول لايكثر
الام:: اوهوووووووو منكم انتوا الاثنين كل واحد يعيب الثاني روحوا من وجهي لا كل واحد بالملاس على راسه
محمد وبسمه::لالالالا ههههههههههههههههههه وانحاشوا ثنينهم كل واحد على غرفته
طلعت سحر من غرفتها متاخره عالسواق بسبب وسواس البنات هذا موحلو وهذا بايخ هذا قديم وهذا يطلعني سمينه وهذا يقصر ووووو
نزلت تحت وقبل لاتطلع صوت تكرهه من كل قلبها يخرب مزاجها ويعكر جوها صوت مرت ابوهاا (خلود)
خلود::وين رايحه توه العصر بتهجين هذا عادتك كل يوم مكان تتهربين فيه عن جلسة البيت
سحر::الصراحه راحه لو جلسة البيت جنه بيت صديقاتي احلى جنه بالعالم وبعدين انا مااطلع الا باذن ابوي ومااطلع كل يوم زي ماتقولين وبعدين هذا بناتك الثنتين يطلعون حتى ماياخذون شور ابوي وانتي تاركه المجال مفتوح لهم اما انا لا
خلود:: انتي من صار لك ربع منتفين مثلك وانتي لسانك صاير طويل هين انا بوريك انشالله كيف بحرمك منهم
سحر::يارب ارزقني الصبر مابي اطول لساني انا محترمه نفسي باي
وطلعت سحر وهي مقهورة وخايفه من سوايا مرت ابوها لانها عارفه ان مرت ابوها موهينه وتقدر ترص راس ابوها بالكلام عشان يقلب عليها ركبت السياره وسكرت الباب وتسندت على الباب وراسها على النافذه وتطالع الشارع وعيونها مليانه حزن وجات ببالها خاطره (حبيبي كنت من قبل بجانبي تصبرني على همي وتسكن وحشتي وعندما رحلت لم يبقى لي احد يبعد عني كيد الاعداء وطعناتهم )
وصل السواق واهي سرحانه انتبهت وقالت حق نفسها من متى واحنا هنا ونزلت بسرعه وقالت حق السواق مايجيها الا لمن تكلمه
وصلت عند الباب توها بتطق الا الباب انفتح وارتاعت شافت محمد بوجها شهقت ودارت وعطته ظهرها قال لها شخبارك سحر قالت بخييير ظل يطالع فيها وهي معطته ظهرها وماهو حاس انه مسكر عليها الطريق عشان ماتدخل ومن التفهي قالها شفيك واقفه عند الباب دخلي اهي ضحكت لانها تدري بشعور محمد تجاهها بس اهي تعتبره مثل اخوها قالت طيب وقربت عند الباب وحس وبعد (واخيرا ههههههه)
دخلت وشافت ام بسمه بالصاله وسلمت عليها واستاذنتها ورقت عند بسمه بغرفتها
بسمه كانت تستشور شعرها وتغني (انا ضايق وبالي ضايق وجوي ضايق ضيق كايد) دخلت عليها سحر وتكمل (نفسي ملت روحي ولت --)الا وبسنه تضحك وتضمها ويقعدون يسولفون مع بعض حست بسمه بضيقة سحر قالت لها اقول مسويه نفسك سالي حمدي ربك عندك صديقه مثلي الاسالي مسكينه ماعندها ربع يجونها كل يوم ويكلمونها اربع وعشرين ساعه
سحر::هههههههههههههههههه
بسمه ::دووووووووووووووومز هالضحكه
سحر::بسمه اليوم كلمت اخوي حمد يسلم عليك
بسمه::احمر وجهها صج اهو شخباره انشالله بخير
سحر تبقى تجنن بسمه::يقول عاجبته القعده هناك الظاهر احم احم
بسمه تغير وجهها::الله يوفقه اهو مثل اخوي
سحر::اووووووووووماااا عاد مثل اخوك قويه اقول بس لاقال عاجبته القعده ولا شي يقول مشتاق لاهل السعوديه واللي فيها
بسمه:: لاتعليق
سحر اخوها الوحيد من امها اهوحمد وعندها خوات من مرت ابوها ثنتين لطيفه وبشايروحمد مسافر بريطانيا يدرس ويحب بسمه والحب متبادل
نحلق بعقولنا لبريطانيا حيث حمد وصديقه بدر عايشين مع بعض تعرفوا على بعض في بريطانيا وصاروا اكثر من الاخوان
حمد::اه ياقلبي يابدر والله احس اختي محتاجتني متى اروح السعوديه واريحها
بدر::لاتشيل هم كلها شهرين وحنا متخرجين
حمد::بس انا اللي معور قلبي ان سحر تبقى تدرس طب بره السعوديه يعني راح نفترق مره ثانيه
بدر ::ليه ماتروح معها وتشتغل مكان ماهي تدرس عشان ماتكون بلحالها
حمد:: اي ووالله اذا تخرجت اهي يصير خير
بدر اقولك بس قوم خلنا نطلع كلها شهرين ونودع بريطانيا عقب خمس سنين دراسه
حمد:: يلا نطلع شنو ورانا
بدر صديق حمد خلوق وحكيم وجميل (ياعيني)والف بنت تتمناه وحتى بنات العايله يموتون عليه ينتظرونه يتخرج عشان كل وحده تعرض مواهبها السحريه عشان ينعجب فيهم بس هو ثقيل وماعمره حط عينه على بنت
نرجع السعوديه
(لازم اقهرها قامت تطول لسانها بعد وتدافع عن نفسها هذا اللي باقي بكره تشكي لابوها الحال وانا اطلع الخسرانه )
تقطع عليها سرحانها بنتها بشاير ::يماااااااااااه
خلود::وجع خير
بشاير:: يمه البنات امهاتهم يقولون لهم هلا بنتي هلا حبيبتي امري وانتي مغير وجع وجع حتى قلبي صابه وجع هههههههههههاااااي المهم يمه الليله في حفله وبروح مع صديقاتي وبنام عند صديقتي سلوى
خلود::لا والله سكني عندهم بعد ليش ماعندك بيت تنامين فيه
بشاير::يمممممه حراااام والله زهق البيت موحلو لطوف في الدمام مع بنات خالتي انا شسوي اقعد بروحي وسحيره وعععع ماتنبلع اذا قعدت معها تقولين قاعده مع ماما نورة ماب مابي بروح لاتقولين ماعطيتك خبر يلا شاااااااااو بروح اجهز
خلود وهي تصارخ :: صاير مالي كلمه في هالبيت على الاقل احترموني الا وتشوف الابو بوحمد داخل وتزود بالكلام لان هذي فرصتها انا اللي تحملتها واعتبرتها مثل بنتي تسوي فيني كذا بس حسبي الله
بوحمد::شفيك شصاير
خلود والعياره مقطعه بعض::شلون شفيني خلني ساكته لاحد يقول انا اسبب الشر بينك وبين بنتك
بوحمد::شفيها سحر شمسويه
خلود::اسالها وين بتروحين واذا بتتاخر عشان نحسبها عالعشا تقولي مالك شغل وعابت خواتها تقول انهم يطلعون من غيراحد يدري
وطلعت ولا كنها تشوفني
بوحمد عصب حيل ودق على السواق يروح يجيبها
راح السواق ودق على سحر جوالها مقفول مافي شحن
ونزل وطق الباب وردت عليه الشغاله وقالها تنادي سحر راحت الشغاله تنادي سحر
سحر::يؤ غريبه السواق يسمع بالعكس انا قلت له لاتجي الا لمن ادق عليك
بسمه ::عاد قوليله يروح مافي امل تروحين الحين اصلا العشا شوي ويجهز
سحر قلبهامومطمن قامت دقت عالسواق من تلفون بيت بسمه وقالها :: بابا معصب لازم يجي بسرعه يودي بيت
سحر ياااااااااااااارب ساعدني مابينت حق بسمه ان راح تصير سالفه ومصيبه بالبيت
سحر ::بسمه لازم امشي ابوي يبيني يقول عازمني عالعشا(اي هين)
بسمه ::اووووووووه حركات بس ماراح ارضى عليك بس روحي شكله ابوك جايب لك عريس المستقبل
سحر::شنو شنو ماسمعت لايكثر بس يله بروح تاخرت
بسمه::لاتنسين عليك حق تجين تتعشين مره ثانيه
سحر اوكي يله باي
نزلت سحر واهي قلبها يدق سامري خايفه حدها ونفس الحاله تسندت عالنافذه وجات لها هالخاطره(حبيبي اين انت لتنقذني من ماسياتي اين انت لكي التجئ اليك وقت شدتي اين انت اين لكي احتمي بك من اقرب الناس الي) وصلت بسرعه فائقه لان السواق كان خايف ويسرع نزلت سحر ودخلت البيت وناداها ابوها
بوحمد::سحر
سحر::نعم يبه
بوحمد:: ولك عين تطالعيني بعد مفروض تنزلين راسك بالارض (كان بوحمد مايبقى يطالع عيون سحر لانها تذكره بعيون الرحومه اللي ماتت مقهورة بسبته )
سحر نزلت عيونها وطاحت دموعها
ابوها حن عليها وقالها :: روحي غرفتك هالمره سماح بس مره ثانيه لا اسمعك قايله عن خواتك كلام بايخ وعيب انك تقولينه
سحر::بس يبه انا ماقلت شي غلط
بوحمد::لا وتردين بعد شنو اللي موغلط بكلامك الحين خواتك صاروا يطلعون بكيفهم وانتي لا
سحر::يبه انا اسفه عالكلام اللي بقوله بس بقولك قبل لاتجي تحاسبني تاكد من كلامي وهي عارفه ان خواتها موبالبيت بس ماتبقى السالفه تكبر
بوحمد ماحب يطق سحر او يهينها زي كل مره صرخ عليها وقالها :: انقلعي من وجهي مابي اشوفك يلااااااااااااا
طلعت سحر ع غرفتها واهي ميته صياح لمتى هالمشاكل ولمتى ابوها يفكر فيها انها شينه ااااه اااه من هالدنيا انسدحت سحر على سريرها واهي تصيح حتى مابدلت ملابسها ونامت من القهر
حلمت سحر بواحد حلو حيل وكانت طايحه بحفره ومرت ابوها تضحك عليها وبناتها بس هذا الولد جا ونقذها وخذها معاه



مابقى اطول عليكم هالبارت انشالله بالبارتات الجديده رارح تكون الاثاره اكثر واكثر بس انتظرووووووووني
مع التحيه وشكرا


الرجوع الى أعلى الصفحة اذهب الى الأسفل
القلب الحنون
وسام التميز
وسام التميز
avatar

عدد المساهمات : 161
نقاط : 3038
تاريخ التسجيل : 12/02/2010

مُساهمةموضوع: رد: ماهقيت حبك سراب   الثلاثاء فبراير 16, 2010 6:07 am

مشكوره اختي حلوه لكن اخذت من وقتي كثير مرره طويله يسلمووو
الرجوع الى أعلى الصفحة اذهب الى الأسفل
$خيال$

avatar

عدد المساهمات : 68
نقاط : 2891
تاريخ التسجيل : 12/02/2010

مُساهمةموضوع: رد: ماهقيت حبك سراب   الخميس فبراير 18, 2010 4:20 am

مشكوره القلب الحنون لكن عشانك هالمره بخليها البارت قصير
الرجوع الى أعلى الصفحة اذهب الى الأسفل
العاشق
اداري متميز
اداري متميز
avatar

عدد المساهمات : 96
نقاط : 3053
تاريخ التسجيل : 09/02/2010
العمر : 33

مُساهمةموضوع: رد: ماهقيت حبك سراب   الأحد فبراير 21, 2010 4:40 pm

ما أروع لحظات الحروف معك
وما أجمل مشاعرك
سيدتي
خاطرتك
سطورك
كلماتك
كلها لؤلؤة في السماء
تلمع مع شعاع القمر
رغم نيران التي تجتاح همساتك
إلا أنك
أبدعتت حق الإبداع
ألف كلمة وأكثر من ألف كلمة الشكر
لكي ولقلمك الرائع
اشكرك مرارا وتكرارا
الرجوع الى أعلى الصفحة اذهب الى الأسفل
$خيال$

avatar

عدد المساهمات : 68
نقاط : 2891
تاريخ التسجيل : 12/02/2010

مُساهمةموضوع: رد: ماهقيت حبك سراب   الأربعاء فبراير 24, 2010 1:34 am

صحت سحر من النوم واهي مبسوطه وتضحك قامت كالعاده تناظر شكلها بالمرايه وتقول والله حلو مره ماعمري شفت مثله هههههه صج مااستحي وه ياقلبي خل ادق على بسوم
خذت سجر جوالها ودقت على بسمه رن جوال بسمه وكانت الساعه 11 سحر تحب تصحى الصباح بس الحلم أخرها هههه رن رن رن
بسمه::هلا بالمزعجه
سحرزعلت ::طيب بسوم يلا باي
يسمه افااا امزح ياقلبي والله احاتيك من امس شصار مع ابوك
سحر::-----------
بسمه::مابقى اثقل عليك او ازيد جروحك بس خفت عليك
سحر::بسمه متى يجي اليوم اللي ارتاح فيه متى ليه اللي احبهم يروحون مني واضل بروحي
بسمه قامت تصيح بس مابينت لسحر::سحيره اقول توك قاعده من النوم وتصيحين بيصير وجهك بالون بسك
سحر::هههه صج بسوم بقولك شفت واحد حلو مره امس
بسمه::منهووو وشنهو وشالسالفه ليكون ابوك جايب لك خطيب
سحر::لالالا مالت في الحلم وه يابسوم واحد حلو وشكله هادئ ويجنن بس اااااه على اللي مضى كان اروع من الروعه بس الله يسامح ابوي اللي حرمني منه ومن حنانه
بسمه:: سحرحبيبتي لازم تنسين الماضي والله شوفي شكلك شنو صار تغيرتي مره كنتي وردة متفتحه كنتي الضحك من الصبح مالي وجهك كنتي وكنتي بس الحين صرتي غير انقلبت حياتك لازم ترجعين سحر الاولى
سحر::هههههههههه بسمه تصلحين دكتوره نفسيه
بسمه::مالت عليك اقولك انتي قلبك قوي مدري كيف راح تشرحين الناس
سحر::انا راح اكون انشالله انسانه مهمه جدا جدا بس ادعيلي يابسوم مابقى لي غيرك ابقاك معاي على طول لان ابوي عليه السلام بعد ماتزوج مابقى لي غير اخوي حمد وانتي
بسمه اقول طولتيها يلا روحي ابي اقوم اتروش واصلي يلا بايووووو
سحر::باي يالنذله هههههه
بسمه::الوعد اذا شفتك باي
قامت بسمه تتذكر سحر ووووو اخو سحر واستحت من نفسها وغطت نفسها بالفراش الا تسمع صوت طق عالباب وترتاع (ماخلوها تحلم مثل صديقتها هههههه)
محمد::هييييييييي بسوووم قومي بسك نوم امي تبيك تروحين معها المستشفى عندها موعد
بسمه::طيب طيب يمه روعني بقيت اموت وانا حلمانه ههههه
قامت بسمه وراحت مع امها المستشفى لان امها عندها السكر وتروح معها دايم
بعد ماصلت سحر وخلصت دعت ربها يوفق ابوها ويهديه لها قامت من السجاده وبدلت البجامه ونزلت تحت عالمطبخ على طول راحت حق الشغاله ::هاي نانا كيفك اليوم
نانا::تمام سحر بابا يقول يبقىانتا اذا قعدتي من النوم
سحر::وينه ابوي
نانا::في مجلس
سحر:: اوك شكرا
راحت سحر لابوها واهي حاسه بالخوف
دخلت المجلس بعد ماطقت الباب قال لها الاب ::تعالي يابنتي ابقاك
سحر هدا قلبها بعد ماقال لها الاب يابنتي جلست سحر قبال ابوها وقام يناظرها وعيونه مليانه دموع
ياسحر يابنتي انا موقصدي اهينك اواجرحك انا ادري انك زينة البنات عقل ورزانه بس انا ودي اموت وانا مرتاح مابي يصير بينكم عداوه وانا خايف عليك من شر الدنيا
سحر وقلبها مليان حزن::لايبه لاتطري الموت ارجوك يكفي امي راحت وخلتني انت لاتروح خلك معاي حتى لوتقسي علي حتى لو تطقني ماراح ازعل بس لاتقول كذا يبه
قامت سحر تبكي من قلب وارتمت على حضن ابوها اللي فقدته من زمان صار لها فتره ماحضنت الغالي ابوها طوقها بايدينه وحضنها ونزلت دمعته ومسحها جات خلود الي اهي مرت ابوها وشافت الموقف وتطايرت عيونها شرار وقلبها حقد على سحر انقهرت لما شافت ابوحمد يضم بنته وحان عليها خافت لتكون سحر مثلها راح تالف قصص وتسوي مكايد دخلت عشان تقطع اللحظه الحميمه بين سحر وابوحمد
يلا يابو حمد الغدا جاهز يلا ياسحر ولا ماتبين تتغدين معانا مثل كل مره
بوحمد::الا بتتغدى معنا اليوم وكل يوم هذي بنتي الغاليه سحر زينة البنات منو قدها
سحر ماتت من الحيا اول مره ابوها يمدحها قدام الزفته مرت ابوها بس ماحست بالغرور لانها متواضعه جدا
خلود::الله يدوم هالحب انشالله موبكره ينقلب خناق
بوحمد::لاحوووول يلا مشينا علغدا
قاموا يتغدون
في بريطانيا حمد وبدر بعد ماطلعوا من الجامعه راحوا اقرب مطعم يتغدون فيه
طلبوا لهم بعد كذا بدت السوالف بينهم
حمد::يالله مومصدق بس هالاسبوعين ونروح بلدنا ونرتاح
بدريتنهد في داخله ::اي صح ياحمد الا اقول انت صاير قاطع من متى وانت ماكلمت اهلك
حمد::اووووه يابدر والله شقولك اشتاقلهم مره خصوصا سحور توحشني بس كل مااكلمها احس بروحي تطلع صوتها حزين كنها تقولي تعال ياخوي وريحني من هالبيت انا ادري ابويمومقصر معها بس مرت ابوي حقوده ماتخاف ربها
بدر:: حمد بقولك شي بس لاتزعل
حمد:: اهئ اهئ قول قول ماراح ازعل بتخطبني
بدر :: وعععععععععع اخطبك انت شبي فيك يالشاذ
حمد::افااا هههههه قول وش فيك
بدر::ماراح ارجع معك السعوديه
ليييييييييييييييييييييييييييييش اانتظروني واعذروني اذا طولت عليكم مشغوله بدراستي
مشكور العاشق كلماتك اخجلتني واتمنى يعجبكم البارت الثاني
الرجوع الى أعلى الصفحة اذهب الى الأسفل
العاشق
اداري متميز
اداري متميز
avatar

عدد المساهمات : 96
نقاط : 3053
تاريخ التسجيل : 09/02/2010
العمر : 33

مُساهمةموضوع: رد: ماهقيت حبك سراب   الخميس فبراير 25, 2010 10:23 pm

[ندعوك للتسجيل في المنتدى أو التعريف بنفسك لمعاينة هذا الرابط]
الرجوع الى أعلى الصفحة اذهب الى الأسفل
$خيال$

avatar

عدد المساهمات : 68
نقاط : 2891
تاريخ التسجيل : 12/02/2010

مُساهمةموضوع: رد: ماهقيت حبك سراب   الجمعة فبراير 26, 2010 5:39 am

العفو والله احرجتوني باقي جزء بس راح يكون طويل شوي اتمنى النهايه تعجبكم
الرجوع الى أعلى الصفحة اذهب الى الأسفل
$خيال$

avatar

عدد المساهمات : 68
نقاط : 2891
تاريخ التسجيل : 12/02/2010

مُساهمةموضوع: رد: ماهقيت حبك سراب   الجمعة مارس 26, 2010 6:50 am

بااااااااك بعد غيبه طويله
جيت وش جابك حبيبي من بعد طول المغيبي ولاناوي ياحبيبي تغرق الغرقان اكثر
حمد انصدم من كلام بدر وتضايق كثير من كثر الضيقه ماعرف يرد عليه
بدر:حمد شفيك ؟؟
حمد::ولا شي بس حسيت بشوية ضيقه طول غربتي كنت وياي ولما جيت اروح عشان افرح ابوي واهلي فيك قلت بتقعد هنا
بدر وهو يتقطع قلبه وفي داخله الم :حمد بقولك ليش انا بقعد انا متضايق وودي افتح قلبي لاحد ثقة مثلك
حمد::قول ياخوي والله اني حاس فيك شي قوي
بدر:حمد انا قصتي قصه انا كنت احب وحده موووت احبها وهي بنت اصيله وماعمرها سوت غلط وياي بس مجرد اني عرفتها وتعلقت فيها ولما جيت بفاتحها بموضوع الزواج عشان اعرف عنها اسم عايلتها وبيتها صار لي ظرف قوي خلاني اترك السعوديه مره وحده
حمد::وشو الظرف قول تراك وجعت قلبي
بدر::امي كانت بلحظاتها الاخيره نادتني مره وقالت لي يابدر انا بروح خلاص بس ابيك توعدني وعد انك تاخذ بنت اختي اللي ساكنه هنا ويانا ياحمد
حمد::من!!ليكون تقصد البنت اللي تجيك وتكلمك وانت تقول انها فقيره وانت تساعدها
بدر:: ايييه ياحمد اهي والله اني ماعمري حسيت تجاهها بالحب اهي عايشه مع اهلها هنا بس ان ابوها متوفي وامي اجبرتني اخذها تزوجتها وانا كلي الم وحسره ياليتني مت ولا تزوجت
حمد:: بسم الله عليك طيب ممكن سؤال ادري انه يعور القلب بس فيني فضول
بدر:: ادري بتقول شسويت مع البنت اللي حبيتها آآآآآآآآآآآآآآآه ياحمد آآآآآآآه غيرت ارقامي وكل شي عشان ماتقطع قلبي بردة فعلها رسلت لها رساله بقصتي كلها وغيرت حياتي بس والله كنت احبها احبها وللحين احبها بس اخ يالقهر تدري ياحمد اني وعدتها بكل شي حلو اهي يتيمه وعدتها اني اسعدها واكون لها ام واب وكل شي وكانت تحبني حيل وتخاف علي اكثر من امي والله كانت تشجعني عشان اكمل دراستي آآآآآآآآآآه بس ماقدر اكمل وفجأه طاح بدر مغمى عليه
حمد::بدر شفيك ياربي
قام وداه المستشفى طلع الدكتور من عنده وقم حمد :: دكتور شفيه بدر
الدكتور:: اهومتعرض لقهر اوضيقه شي طبيعي لاتخاف عليه راح يصير بخير وتقدر تاخذه اليوم بالليل
حمد:: الحمدلله يارب
في بيت بوحمد خلود طالعه مع بناتها رايحه عرس
بوحمد بالمزرعه مع ربعه
سحر جالسه تتذكر احلى لحظات حياتها مع الانساس الكذاب اللي تخلف عنها وتركها واهي بامس الحاجه له
وقامت تصيح صيا-ح موطبيعي وشهقات وصراخ وتقول آآآآآآآآآآآآآه باعلى صوتها وطاحت ابوها توه داخل البيت سمع صوت طيحه وعلى طووول على غرفة سحر الغرفه مقفوله كسر الباب وشاف بنته بحاله الله العالم فيها من الانهيار
(حبيبي كنت اثق بك لحد الجنون ومع انك هجرتني الا انني الى الان اثق بعودتك لي حبيبي هذا هو عنواني ابقيته لك عندما ترجع لكي لاتضيع مثل ضياعي من بعدك )
راحوا المستشفى ويوم وصلوا على طول اسعاف وخذوا سحر ودخلوها قال الدكتور ان مايصير يتركونها لوحدها وانها متعرضه لتعب شديد او ضيقه (القلوب عند بعضها)
طلعت سحر من المستشفى مر ابوحمد على خلود اخذها من العرس وتفاجات انه سحر وياه اهي وبناتها شافوا سحر منسدحه على الكرسي اللي ورا سحر كانت منتبهه وقامت عشان يجلسون خواتها
قالت خلود ::شفيها سحر منسدحه
ابوحمد::تعبانه بنيتي طاحت وديتها المستشفى وماوصيك ياخلود على بنتي الدكتور قال لاتخلونها لحالها
خلود حن قلبها شوي ::انشالله بوحمد
وصلوا البيت راحت سحر غرفتها :: اف الباب مكسور ماراح ارتاح بروح غرفة اخوي حمد انام فيها
دخلت غرفة اخوها خذت صورة اخوها وقامت تصيح بعدين خذت جوالها ودقت على اخوها حمد كان بالمستشفى باقي شوي ويطلع بدررد عليها واهو صوته متغير من التعب ولانه تاثر بقصة صديقه
سحر وصوتها تعبان::هلا اخوي
حمد::هلا حبيبتي شفيه صوتك
سحر قامت تصيح :: حمد انا تعبانه وقامت تقول كلام وتقول حق حمد اذا انت تحب بسمه لاتروح عنها وتخليها والله حرام وتصيح وسكرت بوجهه
حمد خاف على اخته شفيها ليكون ابوي صار له شي على طول دق على ابوه
رد بوحمد:: هلا ياابوي وشفيك داق هالحزه
حمد:مافي شي يبه انتوا بخير مافيكم شي
بوحمد::لاشفيك انت
حمد:: سحر فيها شي يبه ؟؟
بوحمد:: ايه والله تعبانه توني جايبها من المستشفى حمد خاف عليها حيل:: شفيها يبه هذا من الوحده اللي حاسه فيها
بوحمد::اي يايبه الدكتور قال لاتخلونها لحالها
حمد:: يبه خلها تزور صديقتها يمكن ترتاح
بوحمد:: انشالله يبه يله انتبه لنفسك ولا تحاتي احنا بخير ابيك ترفع راسي بشهادتك
حمد:: انشالله يبه
طلع حمد مع بدر ركبوا السياره وحمد متضايق من الجهتين بدر شاف حمد متضايق واهو يسوق قاله::حموووود شفيك تراني مافيني شي
حمد::اقول انت تفكر خايف عليك انا خايف على اختي مريضه
بدر ::ههههه هين اجل بطيح مره ثانيه الا جد وش فيها اختك
حمد:: والله مدري عالعموم انا جهزت اغراضي راح امشي بعد يومين وانت تجيب الناتايج وتلحقني مالي خلق احضر الحفل
بدر:: لهدرجه تبي الفكه مني يله ماعلي لاحقك لاحقك بس خل تخلص مشكلتي
حمد:: بتخلص امشالله
بدر يقول في خاطره ماظنتي بتخلص
بعد ماناموا نومه طويله بعد تعبهم وسهرهم صحوا كل واحد بنشاط سحر اول ماصحت دقت على بسمه
سحر ::الووووو
بسمه::هلا بالغايبين اليوم ماظن بياخذونك طب كله غايبه
سحر ::ياحبيتي بس نظره واطيحهم ويقبلوني
بسمه :: مشكلة الثقه
سحر::هههههه والله امس تعبانه
بسمه :: اووووهوووو لاتقولين لازلتي تفكرين فيه تراك الحين مرت اخوي
سحر تضايقت:: اقول بسوم سكري الموضوع خلينا رايقين
بسمه::المهم انا عازمه نفسي بيتكم اليوم
سحر::جيبي كل شي حلو وياك عندي لك مفاجاه
بسمه :: اذا يستاهل بجيب
سحر والله لو تعرفينه تجيبين كل الحلو والمالح والمر خخخخخخ
بسمه::امممممم كني عرفت بس بخليها مفاجاه لي ههههه
قامت سحر تروشت ونزلت تحت تفطر مع ابوها وخواتها وزوجة ابوها
صباح الخير يبه
هلا ولا ببنيتي شلونك اليوم احسن انشالله
سحر:: الحمدلله اي احسن
خلود موبالعاده تهمها سحر بس حنت عليها هاليومين:: مالك شر ياسحر
سحر::الشر مايجيك
طالعت سحر خواتها وابتسمت ابتسموا لها انشق قلبها نصين خواتي ابتسموا لي شعندهم
فرحت مره
بعد مااكلت
قامت كلمت اخوها حمد بعد ماخوفته امس
وقالها انه بيجي قالتله انها تدري حاسبة له
وقالها تسلم على بسمه
ماتت ضحك وطفشت اخوها قالت له انها انخطبت ومات قهر وبعد ماعرف انها مقلب توعد سحر
يــــــــــــــــــــــــــــــــوم الرحيل
بدر متضايق كلعاده
حمد مبسوط بنفس الوقت متاضايق على اعز انسان وقف معه وصار رفيقه بغربته
بدر:: اووووووووووووووف وشهالطفش
حمد:: انا حنبك وانت طفشان
بدر واهو يسوي حركات بزران :: مابيك انت بتروح عني وتخليني بروحي
حمد:: هههههههه ياشينك وانت طفل
بدر::ههههه يمكن هذي اخر ضحكه اضحكها وياك
حمد:: افا يابدر مستحيل انساك ولا تفكر مثلك خاين بتخليني ارجع بروحي
بدر:: ادعيلي ياحمد ابي ارتاح واخلص من هالمشكله
حمد:: انشالله لها حل
بدر دمعت عيونه حاس انه اليوم اكبر غريب بالدنيا بيروح اعز واحد عنده اللي مابقى شي الا واهو يعرفه عنه الحين مابقى بينهم اسرار
راحوا المطار ودعوا بعض باحضان حاره جدا
(يعني الكل مجرب يودع صديق او اخ او حبيب حسيتوا بهاللحظه)
رجع بدر الشقه وهموم الدنيا على راسه تذكر مكالمه له مع حبيبته
بدر::ممكن اسالك سوال
::تفضل اسالني
بدر::اذا غبت عنك عشر سنين وش تسوين تنسيني
::مايسمع الا صوت صياح ونياح
بدر:: شفيك حبيبتي بسم الله عليك
::بدر اذا تحبني امانه لاتطري الفراق والله اموت
بدر:: والله خلاص ياقلبي انا اسف خلاص
بدر تذكر هالشي واهو متضايق يقول الحين لودقيت اهي موجوده ااااه ياقلبي يمكن راحت بنصيبها الله يوفقها انشالله
بس انا راح اظل احبها لاخر يوم بعمري ماراح انساهاوراح اتخلص من زواجي الفاشل باقرب وقت
دق على زوجته بالاسم وبس
وقالها يبيها بموضوع مهم
التقوا بكافيه بدر ماوعارف وش يقول
قالت هي بدر انا عارفه وش بتقول انا ادري انك ماتبيني وانا مارارضى اعيش مع انسان مايبيني حاولت اتقرب منك وانت قلبك ساهي عني انا صحيح حبيتك بس ادري ان بقلبك وحده ثانيه وانا احبك وابيك تعيش مرتاح
عشان كذا بدر احنا من الحين منفصلين ومابيك تشفق علي انا عندي خير ومابيك تزورني حتى مابي اشوفك
قامت ومشت لين اختفت من نظراته واهو مومصدق اللي سمعه وبنفس الوقت ضميره يانبه خايف من اللي صار بس حس براحه كبيره وقام يضحك بصوت عالي وكل اللي حوله قالوا هذا مجنون
قام وراح السوق وشرى اغراض كثيره مايدري ليش شاف محل بناتي دخل وخذ ملابس كثير وطلع واهو مايدري حق مين وفكر انه مايقول حق حمد بيخليها مفاجااه وراح يرجع بعد اسبوع عشان يضبط كل امورة ويحضر الحفل ويرجع
في بيت بوحمد الصراخ قايم والفرحه عمت عليهم برجوع اخوهم الغالي حمد وسحر اسعد انسانه لكن تحس انها مشتاقه لحمد كثير ومافكت منه قعدوا سوالف وضحك وفرحه
وفي وسط الفرحه قال بوحمد::والله انا بعد عندي لكم خبر حلو بس قلت بخليه لليوم عشان تصير الفرحه فرحتين قالت خلود ::قول يابوحمد واحنا نسمعك
بوحمد::ذاك الاسبوع ياسحر محمد اخو صديقتك بسمه خطبك مني
وانا قلت بشاورك قبل وانا اقولك يابنتي وافقي الولد رجال ونعم منه انا قعدت اسال عنه كثير وماقالوا عنه الا الخير
سحر:: ___________
حمد::سحر شفيك السكوت علامة الرضا
سحر::___________
الا وتدق بسمه ويتغير الجو
سحر::الووو ياحلو
بسمه::هلا والله وش فيه صوتك مغبون
سحر:: ولاشي
بسمه ::اممم بس دقيت ابي اسال عنك
سحر ماتت ضحك:: الا قولي بسال عن اللي خذ قلبي وروحي
حمد انحرج وقام قال يله انا بروح اريح شوي
بسمه سمعت صوت حمد وسكتت
سحر:: شفيك كل لسانك الوحش
بسمه ::وجع اقول ياربييييه وحشني هالصوت
سحر:: لاتخافين اسبوع الجاي جايينكم
بسمه سكرت بوجه سحر
سحر ضحكت
قامت لغرفتها لانها ماحبت تبين لاهلها شي عقب اللي سمعته وحبت تنسى الموضوع
تــــــــــــــعــــــــــــــــبــــــــــت
بكمل عقب ماشوف ردودكم
تحيااااتي للجميع
الرجوع الى أعلى الصفحة اذهب الى الأسفل
العاشق
اداري متميز
اداري متميز
avatar

عدد المساهمات : 96
نقاط : 3053
تاريخ التسجيل : 09/02/2010
العمر : 33

مُساهمةموضوع: رد: ماهقيت حبك سراب   الجمعة مارس 26, 2010 6:56 am

[ندعوك للتسجيل في المنتدى أو التعريف بنفسك لمعاينة هذا الرابط]
الرجوع الى أعلى الصفحة اذهب الى الأسفل
$خيال$

avatar

عدد المساهمات : 68
نقاط : 2891
تاريخ التسجيل : 12/02/2010

مُساهمةموضوع: رد: ماهقيت حبك سراب   الجمعة مارس 26, 2010 7:26 am

مشكور العاشق على مرورك واتمنى عجبتكم لانها اول روايه اكبتها انشالله تعجب الكل
الرجوع الى أعلى الصفحة اذهب الى الأسفل
 
ماهقيت حبك سراب
استعرض الموضوع السابق استعرض الموضوع التالي الرجوع الى أعلى الصفحة 
صفحة 1 من اصل 1

صلاحيات هذا المنتدى:لاتستطيع الرد على المواضيع في هذا المنتدى
منتديات حبي زيزو :: منتدى قصص مشوقه ومثيرة :: قصص حب-
انتقل الى: